L’érop lé loin ! Mé wala ké yèr soir dann plizyèr landroi La Rényon, demoune la vi bann zovni. In tan téi di sa bann marssien i vien rogarde anou do pré pou oir kossa ni rossanm… Mi rapèl in zour laba dann La plène dé kaf in bononm la bite dsi in sokoup volant dann in kléryèr avèk bann pti zonm étranj dann lo véikil.

Li la parti la zandarmri rakonte lo zafèr mé konm i di lo zoizo té fine anvolé. Mé dann tan-la lété lékilib par la térèr é l’avé arienk bann zovni pou fé pèr anou. Mé zordi ? zordi bonpé dirizan i débloke é kissa i di k’i ariv ar pa nou arien.

Sirtou dopi k’la Franss l’apré monte in baz militèr La Rényon mèm in gro gradé dann télé la di parétil-antanssion mi vann konm mwin l’ashté !- la di li sava toush sinksan militèr. Akoz pa pliss, akoz pa mwinss, mé antouléka mi wa nou mal dann in n’afèr konmsa.

Mézami, m’a dir azot i fo pa ni pran lé shoz a la lézèr pars nou ni parl losséan indien zone de paix é Lo Prézidan, son koté li amenn in zé i pé vni danzéré é i fo nou rényoné nou néna noute de mo pou dir dann kékshoz konmsa.

A bon antandèr salu !

Justin