Mi domann amoin si tazantan nout vyé fonn san z’ésklav i domine pa nou. Pou kosa mi di sa ? Pars, souvan dé foi, mi antann demoun tro rézigné, demoun i pans na poin arien pou fèr, domoun lé batu d’avans. Batay po d’fèr kont po d’tèr : po d’fèr sé lé z’ot, po d’tèr sé zot. Donk na poin arien a fèr pou vanj kont la fatalité, kont la rézignation.

Sa la pa in vyé fonn san l’ésklavaz sa ? Rapèl azot in pé nout l’istoir. L’avé souvan dis zésklav pou in mèt. Malgré sa lété lo mèt té k’i gingn toultan. Pli pir ksa, l’avé zésklav té i rotourn kont z’ot kamarad la mizèr, pou pran la défans lo mèt, pou ète dann kan lo moun bien… Ni koné lo ga téi apèl Figaro : li mèm la trayi bann révolté Sin-Lé. Kont koué ? Kont in bout la tèr dann sirk Silaos.

Moin na konm l’inprésyon nout vyé san l’ésklavaz lé fasil pou révéyé. Mèm si pou komansé ni di ni sar révolté, ni sar tyé douz blès katorz… épizapré nou lé abati, ni san nou lé pa kapab rézisté, nou lé moungé. L’èr-la nou lé blijé révolt kont nou mèm. Nou lé blijé soubat kont nou mèm pou nou gingn afront lé z’ot, lo z’énmi sansa lo z’advèrsèr. Si ni gingn la viktoir kont nou, ni pé gingn osi la viktoir kont lo vré z’ènmi, lo problèm, lo lanspèk l’apré anbar anou. Nout promyé z’ènmi sé nou !

Dann tout z’afèr : dann la politik, dann l’ékonomi, dann lo sosyal, dann in projé nou l’apré améné, mèm dann in ménaj sé sa mèm. Pou gingn bien vanjé i fo ni komans par vanj kont nou mèm, épi tazantan ni ronouvèl nout viktoir dsi nou mèm… Alors konm di la shanson Richard Anthony : « Bats toi ! » é pou komansé kont toué mèm, aprésa lo tour lé z’ot va vnir.