I mank touzour in santim pou fé in léro èk la rout d’si la mèr. Lo promié tan banna té i kont fé sa san zékli, san réspèk nout lanvironman, lé vré, érézman ankor, tanzantan inn dé lé la pou ral si la klosh sansa pou rodrèss lo bord ziska tan va di in zour “arèt in kou éskint nout péi èk sa“. Kan mi di i mank in santim, fo plito di i mank in sharèt larzan vik lé éspésialis i prétan o final, nou nora pou 2 miliar sin san. Pou lèr, néna in miliar si san, é lo rès va v’ni.

Lo prézidan k’lé la ziska mwa désanm la di dann télé dimansh o swar (parlfèt sanm pou mwin zot té an famyi dimansh, la apèl lin a lot par lo prénom) pou bouk lo bidzé in miliar si san, té i mank si san mil éro é kélké, sépousa konm li di li minm, li la prèt larzan èk in bank é boudikont pou rann nou néna pou karant sinkan ziska 2060. San konté lo sirplis, nout tout i koné néna touzour in sirplis kan i abord in gran santié konm sa.

Zordi la rout lé bloké, i di lo minis lékolozi la arèt lo santié par rapor té i dwa aminn rosh madégaskar é néna lé krintif d’si la proproté bann rosh. Souvyin a zot té i dwa ansèrv isi dann la karyèr bwa blan, konm domoun la manifésté, dikou la abandonn lo prozé. Sanm pou mwin dopi lo débi minm ni san konm si lo prozé lé mal fagosité, rosh na pwin, larzan lé pa sir pou fini. Vik bwa blan domoun i vé pa, vik na pwin dot karyèr ayèr, vik rosh madégaskar i krin, vik i pé fé otroman, arèt èk sa !