Tèr la mi sort antann in kozman i fé gingn la tranblad minm si lo réshofman la planèt. In boug, in éspésyalis pou koz d’si la COP21 la di konmsa“Arèt fé shap lo gaz sinonsa na mor nwayè“. Si lo kou mwin la pa tro konpri lo kozman, kèl rapor néna ant lo gaz léshapman èk dolo ? I di sé lo dégazman gaz korbonik ki fé shof la planèt é la zordi nou lé o bout di bout, nou lé finn désot lo 2 dégré plafon. An d’si 2 dégré nout kana lé nwar.

Sépousa a partir lindi 30 novanm ziska vandrodi 11 désanm, laba Pari, néna o mwin 145 shèf léta réini ansanm pou sèy mont lo plan zistoman pou tyinbo èk lo 2 dégré. Si ni dépass lo 2 dégré, i prétan i gingn arpi rovni par déryèr. Na d’moun, plito bann zasosyasyon la désid pran an min tousala. Minm si zordi ni koné pa koman tousala va tourné. Si i tonm dakor èk lo plan, va mèt an plas a partir 2020 é tou lé 5 kan va rovwar lo plan.

Tout fason na pwin pou mayè, lé obizé trouv in solisyon. Konm ni di, la solisyon lé déza dann lénérzi prop, konm lé osi dann lotonomi énérzétik, dann lénérzi pa poliant. Finalman, boudikont poukoué i ansèrv lénérzi poliant vik sanm pou mwin lénérzi prop i kout pa pli shèr ? A nout nivo ni koné pa tousak i pé provok bann katastrof lanvironman, tousak i pé détrak lo tan mé sak ni koné, konm lo boug la di dann radio“Si ni arèt pa fé shap lo gaz, na mor nwayé“