Nana san-sinkant mil pèrsone la fine done lo non Pol Anploi pars zot na poin travay inn-tyork, ou sinonsa pars zot i tir lo dyab par la ké èk in pti travay pa konsékan. An parmi bann jènn sak na moin vinn-sink an, par la soisant pour san i rod in boulo, mé i trouv pa. Toudinkou, bann z’oizo d’malèr, bann résponsab shomaz, sèk isi konm sèk la-ba dan la Frans, i an apèrsoi. Lé ga ! Mi koné pa si zot la fine èt dann shomaz, mé mi pé dir azot sa in n’afèr lé dir pou viv.

Biensir, plito ké rod in solisyon, lé pli fasil dir demoun i profèr gingn bann minima sosyo plito ké travay — i prétan in tyèr dmoun i gingn so bann minima. Lé pli fasil galman dir demoun i profèr viv dan l’asistans plito ké alé transpiré pou gingn son pourkoi. Lé pli fasil galman di domoun lé frodèr l’Asédik. Mèm si na poin la prèv ! Mèm si sak i di sa, zot kalkil lé fé par zot mèm... In soir dann télé, in boug la koz dovan kaméra. Li la di, li la pa in voiyou, li rod travay é li trouv pa. Alor, i fo pran ali o séryé, sansa i fo pa prann ali o séryé ? Si i pran pa o séryé ankor, moin lé a d’mandé kosa i fo...

Solman, fransh vérité, sanm pou moin, in bann gro vaza la pran d’moun pou in bann z’inbésil, la sèy pran, konm i di, z’anfan Bondyé pou kanar sovaz. Didier Robert, konbien d’moun lé dann shomaz par li ? Sa i fé pa li arien. Mésyé préfé ? Demoun i soufèr la vi shèr, li na lo droi é lo pouvoir pou fé in n’afèr, é li pran son tan. Bann kapitalis, zot na l’arzan pou dévlop lo péi, mé zot i sousyé pa. Si posib zot i vann patrimoine rényoné bann moun déor. I fo sa i arèt in zour, pars lo moun l’asé. Arèt in pé, don ! Pandann tan-la, kabri i manz salad !

 Justin