Na d’kou ni pé èt an dézakor, d’si désertin sizé inn i pé awar son lavi, kontrèr sad lot, pa pou sa i fash, pa pousa i tyinbo rankinn linn a lot, sirtou konm di bann déor, sirtou si sak i ini a nou i tonm pli zinportan sak i diviz a nou. Sanm pou mwin néna in sizé poukoué nout tout ni dwa ral an minm tan, sé si lanplwa pou bann zènn la Rényon. A mwin minm mi an souvyin, lané 2013, lo 20 mai si mi tronp pa, in lassosyasyon bann zènn la mobilizé la d’si “Priorité pou anbosh Réyoné la Rényon“.

Banna i di néna lanplwa disponib la Rényon mé lo problinm sék bann zèn minm sak néna diplom i ariv pa avèk, vik souvan-dé-fwa bann zanplwa la i pass minm pa par pol anplwa. Sirtou, sityasyon bann zènn isi lé délika, 60 pour san zènn i dor a tèr. Pwatan néna kan minm inn dé lanplwa la Rényon, tou lé zan néna 1000 pos lédikasyon nasyonal, néna aryink 100 pou nou, lo rèss i sort déor. Dan la polis i prétan néna 900 i atann pou rantré.

Avan sa lo prézidan li minm li la di konm sa “Ké bann zènn iltramarin i gingn aksèd èk bann zanplwa kréé shé zot, dan lo séktèr privé konm dan lo séktèr piblik“. Sanm pou mwin lé asé klèr. Lo dépité Lebreton té oblizé fé in rapor la d’si. Zordi mi poz in késtyon, ousa i lé lo nafèr, ousa lé randi ? Si i tyinbo kont tousala ? Madam la miniss ou koné lo problinm, argard sa dopré pou bann marmay, sinonsa, konm lo résponsab lo lasosyaton nou osi na di “Arèt taz a nou“