Oté

Arète di sé nou l’otèr ! Arète stigmatiz anou ! Kansa va fini avèk bann zinkapab-la ?

Témoignages.re / 17 février 2021

Mézami, zot i koné in l’asosyasion la fé in prosé dovan tribinal administratif pou fé kass lo l’arété préfé dis lobligasyon pou bann marmaye pou mète lo mask dopi laz sizan dann lékol. Tribinal la done lo lassosyasio n tor, mèm li lété sézi an référé, pad si o fon , mé solman dsi la form. Astèr mi sipoz va sézi lo mèm tribinal déssi lo fon so foiissi.

Mé biensir, lo zour la plinte v’arivé, mèm lo zize administratif, mèm lo délégué la proféktir, mèm lo bann zavoka, mèm l‘asosyasion i konète ar pa si so zafèr d’mask si li lé bon pou bann zanfan si lé pa bon.Sa i rapèml amwin bann zépidémi nou la konète :lépéi démi polio fitintan, lépidémi sikoun gounia, la gingn, é zordi lo covid 19 épi son varyan.
Sa i étone pa mwin ! kan mwin la antann parl sida, mi rapèl pèrsone té i koné pa koman téi falé lite kont sa.zist in sèl zafèr toulmoun l’avépèr, é téi kroi téi fo pi toush la min pèrsone, téi fal épa tèrne an pi blik, téi falé pa non pli asiz dsi kivète Wc, téi falé pa boir dann vère lo sidaïke. Zordi dizon lé parèye, amwins k’in pé l’apré zoué in zé d’kouyon avèk nou.Va koète in zour mé kan ni koné pa ;
Mé lo vré zé d’kouyon sé bann moun l’avé lo pouvoir pou lite konte maladi-la é la pa fé é i kontinyé pa fèr -konm di l’ote avèk in pansman dsi in zanm do boi, wi guéri pa arien.. .Mé ofon toussa lé injust sa par raporte a nou,la pa nou l’amenn sa issi,mé sé nou k’va pèye lo san trant sink éro sak la poliss va bien vouloir trapé..Sé nou rényoné i pass pou d’moun danzéré..
Danzé piblik i sava vèye nout mor ! Danzé piblik pou boire in kou avèk nout kamarade ! danzé piblik pou sinploman ète in pé an parmi noute bann konpatriyote...Sak i rouv la porte zilo dê batan la pa danzéré zot,sak i trik bann motif sèryé la pa danzéré zot.Sak i gingn biyé bon marshé pou amenn zot virus issi la pa danzéré zot ! Sak i vé rouv zot lotèl a toute fors lé insossan zot konm ti mouton i tète zot momon.
Kanssa va déside in kou ankète dsi la shène résponsabilité é konm k’i fo, pétète l’èr-la a trouv lo bon métode.. Mé siouplé, arète di sé nou l’otèr, nou bann zotoktone, nou bann rényoné nout nonbriy lé antéré issi.Lé pli fassl di sa é fé di sa, ké lité pou vréman kont la maladi