Kosa i lé l’ankan ? L’ankan sé kan ou i vann in n’afèr an piblik é ou i sèy tir lo méyèr pri : ou i di lo kalité, a kosa k’i ansèrv, ou i ankouraz demoun pou ashté. Dann provèrb nou la mark an-o la, la pa sa pou d’bon. In zour moin la antann in madam apré di avèk in jène bononm : « Mi priyèr aou arète fé l’ankan avèk ma fiy ! ». Sa i vé dir arète éspoz aou koté èl konmsa vi ké la pankor fé ni lo fiyansaye, ni la rantré. In n’ot zour moin la antann dsi in radyo : « Intèl la vol mon l’oto é l’apré fé l’ankan avèk sa partou ! »…

Donk zot i oi a popré lo sans : sré plis lo ka d’in moun i fé valoir ali par raport kékshoz k’i pé rolèv ali, é ké lé pa li… plis ké d’in moun i fé valoir kékshoz dovan lo moun. Mi koné pa bien si zot i oi sa konm moin. Tout fason in kozman pou la rout, sé solman pou donn manzé la lang é pa pliské sa.