Médam, zé Méssyé, la sossyété, koz èk mwin sé koz èk in kouyon mé sé o pyé d’lo mir k’i oi lo masson.

Lo komandèr kissoi zésklav, kissoi zangazé, kissoi ankor kontromète, téi sirvèye bande travayèr plantassion pou oir si travaye té bien fé épi téi mézir pou oir si la tash lé fé mé banna l’avé mové répitassion.

Sépa si zot i koné mé lo poète Jean Albany la fé in fond’kèr la dsi : « Komandèr, oté komandèr, atann in pé mwin mi atann, v’ariv lo tan, v’ lo tan, nora pi la rass komandèr ». Si zot i rapèl bien kassète « Shante albany » ... In bon séga maloya sa. Lo shantèr té Pierrot Vidot. Bon souvnir pou sak la koni.

Kan ou lé an parmi kamarade, si néna inn i vé done lé z’ord lé zot, vite fé, bien fé, lé zot i kal ali avèk pti fraz mwin la marke an-o la é si wi arète pa, wi pèrde oute bann dalon.

Alé ! ni artrouv pli d’van sipétadyé.