Lé vré dann Port nana in santral éléktrik pouri si tèlman nana inn-dé somèn in motèr la brilé épi bann demoun i arète pa tro loin la gingn la pèr. Alors la di so lizine-la va fèrmé par-la lané 2010. Nitil dir si té in loto, kontrol téknik té fine bat ali atèr.

Lé vré i fo trouv in manièr konmsa La Rénion nana lo kouran k’i fo pou bann moun, bann komèrs, bann lantropriz, pou lékléraz piblik tousala : donkalor i fo trouv in solision pou ranplas lo lizine. Mazine azot in pé si talèr kouran lé an pane shakinstan : la pa bon, sa lé sir.

Solman nana solision épi solision : ranplas lizine par la mèm shoz an in pé pli gro donk vir lo do avèk lo dévlopman dirab, sansa mazine in tik-tak pou fé avans nout plan rézional pou lénèrzi. Sa sé in zafèr sérié pou nou, pou nout rézion, pou lékilib klima la tèr galman.

Alor, akoz pa in référandome ? Akoz pa, pou komansé, in sobatkoz dann télé, in lèr domoun i gingn rogardé, lo moun i gingn poz késtion ? Lo misouk avèk la démokrasi, sa i marsh pa bien ansanm, Siouplé, arète fé zafèr ann sou konmsa !

Justin