Promyé foi, d’apré sak mwin la lir, la donn in pri Nobel bande savan la travaye dsi lo méyèr manyère pou diminyé la povrété dsi la tèr. Sé dire si sé in kékshoz inportan !

Ala in késtyon lé dann l’aktyalité é pa arienk zordi pars shake ané bande zorganizasyon internasyonal i donn bann shif dsi la mizèr dsi la tèr : néna rant uisan milyon épi in milyar d’moune i soufèr la fain, néna bande zanfan i mor d’fain a l’èr a la minit, néna lo mank lo kourante, lo mank léstrésité, néna l’ilétrism la ranforsi ankor é shak ané i pran bande gran désizyon pou abate la mizèr : i fé mèm bande tour d’tab pou ramass larzan mé konm i di : « gran promètère ti donère ». Néna sak i promé é i réspèk pa zot promèss-sansa pa antyèrman-.donk lé bien itil bande savan i travaye dsi sa épi i propoze in métode, épi in solisyon.

Mé ni pé di ankor in kou : arète kozé ! Astère i fo fé !

Si zot la lire noute zoinal zot la sirman lire in nouvèl inportan : sète ané, La Chine va nyabou règ lo kont la mizère dann gran péi-la é gran péi péplé pars son popilasyon i kont par milyar… Si zot la ékoute la radyo zot la sirman antande karant pour san bande rényoné i viv dsou lo sèye povrété pou La Frans. E mèm zot la antann dsi la késtyonn la povrété La Frans la rokilé dann klasman mondyal é la pa zoli pou in péi sé paré-t-il lo sétyèm puissans di monde-sa in onte sa pou li pars bande kapitalis i arète pa gonf zot pla.. Solman lé vré néna in sistèm kapiatalis sovaz i sévi dann péi-la. Lé pa ordinèr !

Mézami, zot i koné zéléksyon i ariv, alor agard bien kossa bande kandida i vé fèr pou lite kont la mizèr pars sa sé kékshoz lé pliss k’inportan !

Justin