Mézami, zot i koné kan kréol i parl mang a tèr, sa i vé dir lo dèrnyé dé dèrnyé. Donk si i pran anou pou mang a tère, i pran anou pou lo dèrnyé dé dèrnyé… Sa sé in n’afèr l’ariv anou souvan dann noute listoir épi na poin tro lontan galman.

Mi rapèl kan la vote la loi départman franssé l’ané 1946, lo député Dr Raymond Vergès é pa arienk in foi la di gouvèrnman i fo pa prande in droi pou in favèr. I fo pa pran sak i rolèv par la loi konm in kado, sirtou si avèk lo kado i raze anou la pinte plito ké trète anou d’égal a égal.

Noute toute i souvien la parol Laurent Vergès-zistoman lo pti zanfan Dr Vergès kan li la di : « Nou lé pa pliss, nou lé pa moinss, réspèkte anou. ».

Konm dabitide gouvèrnman la fé konmsi li téi réspèkte nout parol, mé o boudikonte in foi an pliss li la trète anou konm mang a tère – i pé di ossi konm zanfan batar é é lo même zafèr.

Lé ga, nou l’assé d’sa ! Nou l’assé k’i trète anou konm mang atèr é i fo ni porte atanssion vilin manyèr bande gouvèrnman é ni rofléshi bien shak foi li pran in déssizyon, li na lo myèl dan la voi épi l’amèrtime dann kèr. Dan blan kèr noir !

Alé ! ni artrouv pli d’van sipétadyé.