Mézami souvan dé foi dann in kanpagn la politik, néna demoune i promète in pé ninporte de koi. Travaye pou sak la poin travaye ; la kaze pou sak la poin la kaz, manzé ziska pou sak néna poin manzé konm k’i fo ; gran zétide pou sak la pa fé zétide ; voiyaz, konfor, étsétéra, étsétéra la ké lo ra.

Mi panss dann léstatu épi la sosyété ni viv, i fé pa in plan dsi la duré : in tan mi rapèl bande jenn téi sar fé zétide Kanada, té i pé fèr, si lo métyé zot té i vé aprann néna l’anploi dann landroi. Néna d’moun i yèm pa sa, néna d’moune i panss sé konmsa mèm k’i fo fè. Wi sava fé zétide pou vni shomère, lé pa réaliste sa ! Wi sava fé zétide pars wi yème sa ? Akoz pa, mé kan ou la fine bien kas s oute gongon, ala ké wi rèst atèr ! Moin pèrsonèl, mi yèmré pa in n’afèr konmsa.

Toute fasson, issi shé nou i koné pa la planifikassion, alor koz konm mi fé, sé koze dan lé z’èr... Mé la pa toussa-la, mi sorte antande demoun apré promète bande jenn in travaye, sansa in formasion. Méssyé, Médame, la sosyété, dopi dé z’ané é dé z’ané, dann toute zéléksyon, mi antande demoun di dé shoze konmsa... é apré lo zéléksyon mi oi travaye néna touzour pa, formasyon néna poin otan k’i fo, la mizèr lé bien la é d’moun apré soubate pou gingn in kaz é i gingn pa. Alor pétète, i fodré dir l’moun d’ote shoz.

Akoz pa di : alon shanj braké ! Alon shanj lozisyèl, alon rovoir lékonomi, pétète mèm di alon fé tab raz par raporte lo passé solon in sèrtin poinnvizé. Akoz ni di pa, konm lé shoz i lé, é konm zot i déroule, promète travaye avèk formasyon sé piss dann in violon pou tire in son. Alor, akoz ni arète pa fé sak nou l’apré fé é ni dévloré in prozé révolissyonère ?

La pa pou ropran in nouvo kou la batiye, mé plito éssèye règ bande problème ni oi dovan nou gro konm in mézon avèk bande solisyon noute parti kominiss la fine propoze dopi lontan. Akoz pa sin ploman ésséyé, é pou oir si ti-lanp ti-lanp lé shoze i pé pa avanss in pé. Plito k’ète utopist si nou lété sinploman réaliste épi siouplé arète avèk bande promèss i angaj arienk sak i kroi é pa sak la in vante ali.