Provèrb-la, in provèrb komor. Si ni lir ali bien, ni apèrsoi banna i rézone pa konm nou ; I diré pou zot oplis ou i avans an az oplis ou i gingn an lotorité. Isi, shé nou, La Rényon mi pans pa lé parèye : nou néna la rolijyon lo jenn. Oplis ou lé jenn, oplis ou lé inportan. Oplis ou lé jenn, oplis ou néna lo droi. In l’asanblé avèk in bann koko blan-sansa in bann tète fromaz !- la pa in l’asanblé isi shé nou ni aprésyé pou vréman. Touzis si i trète pa lo lasanblé do vyé toboz. Laba dann péi komor konm dann bann péi l’Afrik, d’apré sak mi kroi, lé pa parèye. Kan ou lé vyé ou néna la syans, la sazèss, é ou néna l’otorité… Moin pèrsonèl mi kroi pa la sosyété par klass d’az, mé sak moin lé sir, si ou i fé lo léfor k’i fo, oplis ou néna zané dsi out tète, oplis ou i ramas la sazès, la konésans, l’éspèryans.final de kont shakinnn i amenn sak li néna : lo jenn néna la fors, l’anvi bouzé, léspri pou antroprann, in pé pli vyé ou néna sa plis in savoir fèr, épi lotorité out léspèryans i done aou, la viéyès sé la sazèss. Alé ! Mi di azot sa konmsa, é zot i pans sak zot i vé ; ni artrou v li d’van. Sipétadyé !