Zot i an souvien Chikoungounia ? La pa si tan tèlman loin dann nout mémoir épi la fé si tan tèlman déga... Mi éspèr zot i ansouvien koman gouvèrnman avèk son bann sèrvis La Rénion, la tourn an ron, la éspèr lo maladi i tinn par li-mèm, san k’i pran mézir sérié pou kal ali.
Zot la mazine kréol i yèm kriyé pou arien, i yèm pléré pou arien, lé mal soufran épi zanfan i plèr pa i gingn pa tété, sa in provèrb anou sa.
Ala k’toudinkou, i apèrsoi l’afèr lé pli sérié k’in pé té i kroi. Alors, i déside bonbard partou san mazine protèz la natir : lo bann ravine, lo bann ti zanimo, lo bann zoizo, lo bann moush-a-miel san kalkil lo déga lé riskab fé déssi tou sa. San maziné nana produi moin danzéré pou tiliz dann la lite kont lo chikoungounia.
Astèr, gouvèrnman nana la krintiv so maladi-la i pète an frans. Si sa i ariv la, la pi bon ditou. Alors i sonn l’alarm avan k’i ariv, i déklansh ziska bann foss alèrte, ministrès la santé i mète a bouzé, fo oir. La pa tro pti tié moustik avèk kanon !.
Bon ! Si i fo, i fo ! I sar pa fé la-ba sak la fé issi kan in moun la "haute" la di : Chikoungounia, sa arienk in for grip !

 Justin