Zot lé riskab dir : « Oté ! Justin ! Out tèt la bloké ? I mank in fèy dodan ? Ou nana in zarnié dann out plafon ? Akoz, kan ou i gard in gayar zafèr dann télé, nana touzour i kékshoz, in arièr gou zafèr ak dann out gorz ? ».

Mi mazine, zot lé konm moin, zot i yèm bien bann z’émission i amontr La Rénion apré dévlopé : bann z’antropriz bien roganizé, bann prodiksion bon kalité, bann moun i gingn bien ésplik kossa zot i fé. Moin pèrsonèl, mi fé in konparézon, rant sak mi oi koméla, épi sak moin la koni dann tan lontan, na pli lontan k’lontan. Épi mi di : « mon péi i avans, mon péi i lèv la tèt, na dmoun l’apré mète ali anlèr ». Solman, sèl z’afèr i mète la tristèss dann fon mon kèr, sé kan mi oi, souvan dé foi, bann rénioné, kisoi dann l’antropriz bien avansé, kisoi dann la tèt ladministrasion, na poin in plas pli konsékan. Lé rar zot lé an avan, plipar d’tan zot lé an arièr, konm i di dann foutbol : "zot lé an rotré."

Trozour, banna la film in zanimo rar : in moun té i tienbo ali, in n’ot té i fé lo komantèr : oussa k’i sort, kèl l’az nana, koman va fé pou gingn suiv ali partou.

Biensir, lo boug té i ésplik lété kalifié dan la matièr. Bien sir, mi anvé pa d’li. Mi pans rozman li lé la pou fé in bon boulo. Mé rant lé dé moun, arienk lo portèr zanimo lété in rénioné.

 Justin