Oté

« Ariv an voitir, ropar a pyé » : in kozman pou la rout.

Témoignages.re / 7 janvier 2019

Sa i vé dir kan ou i ariv ou néna in sèrtin trinn-vi :sa té vré sirtou dann tan lo moun l’avé poin bonpé loto, fransh vérité ! Mi souvien kan moin la gingn mé konésans-sink sizan par la ! -dann mon kartyé l’avé pétète troi-kat loto, in moto, plizyèr sharète, dé-troi karyo pou amenn do lé lo matin. Donk si ou l’avé in loto-antansyon bann bourjoi téi apèl sa in konduite intéryèr ! - té i falé ou l’avé lo pourkoi. Mé fé atansyon, si ou i vé fé lo moun inportan, é si ou téi fé pa vréman bann bone z’afèr, ou téi pé dégringol l’éshèl sosyal plito ké monté é sé l’èr lo moun lété riskab mok de ou. Dir in kozman konm moin la mark an-o la. Zordi galman i pé z’ète konmsa :ou i pé fé bon kalité bizness, mé fèr galman mové kalité biness é lo moun i pé z’ète san pityé avèk ou. Kroiyé moi !Alé, mi kite azot rofléshi la dsi é ni artrouv pli d’van. Sipétadyé !

L’anvi avèk la rézon la pad itou lo mèm zafèr !

Sanm pou moin, promyé l’énmi lo konsomatèr sé l’anvi. La pa bézoin rod marmaye ! La pa bézoin non pli rode bann fam an voi d’famiy ! Lo konsomatèr sé in moun a anvi é kan ou i rogard sn tourné-viré ou i an apèrsoi néna dan li konm in fors irézistib. Ou i oi nénai in fos dan li é li pé pa lité konta sa. L’anvi la pa arienk pou kari bishik sansa pou kari tang ti mizo.L’anvi la pa non pli pou in marshandiz la télé la fé piblisité pou sa ! L’anvi li lé partou, li port dsi tout, lanvi ou i gingn pa fé arien kont li vi k’sé li k’i komann aou.

Néna poin lontan , moin la suiv in moun mi koné bien é nout dé li-li dovan épi moin déyèr- nou la part dann tout sharkitri dann in l’androi La Rényon lé répité pou son sharkitri. Nou la rantré, li la domann dousman kékshoz, aparaman l’avé poin épi li arsort é moin osi par la mèm okazyon. Astèr ni sava dann in n’ot sharkitri é nou fé lo mèm sinéma. Ziska momandoné, moin la fini par dmandé : mé kosa ou l’apré rodé konmsa ? Kosa i fé aléa ou boutik an boutik ko nm in moun néna l’éman dsi li ? Li la réponn amoin, li rode in paké graton la po koshon. La pa graton volaye mé graton koshon é malorèzman na poin donk mi rode mèm.

Lanvi-la ,sé in fors ou vien pa bou lite kont li.

Astèr mazine in pé bann éspésyalis in pé tout éspésyalité. Li la fine fé kroir aou avèk son piblisité, son produyi la lé éstra é si ou i rode out bonèr ou i pé pa pass par koté li ;, sé li k’i fo pou ou. In bon moun la touzour bézoin in bon produi konmsa.L’èrla, konpran azot bien konbien milyé d’moun produi-la i aral é si pé d’moun i nyabou shapé. La pa s amèm i apèl l’adiksyon é l’adiksyon sa sé in kékshoz i komann aou. Pou rézisté i fo ou néna in l’idéolozi inparab kiosi pars ou lé patriyot, kisoi pars ou i yèm out péi épi tout sak li fabrik.