Matante Zélida la ékrir Justin :
Mon shèr nové, mon spès salté,
Ala in nouvo z’afèr. So kou issi, ala ké zot, bann rouj-de-fon, zot i okip z’afèr bann kapitalis. D’apré sak mi antan, i fodré banna i domann azot la pèrmission pou vann lizine, sansa l’antropriz. Promyé nouvèl sa pou moin ! Lé bien loin lo tan zot té i dénons lo kinz famiy té i kapar la tèr, lizine kann é tout sak La Rényon l’avé konm rishès konsékan. A komansé par lizine do sik, épi tout sak i marsh ansanm. Sé konm k’i diré tout z’afèr i shap dann zot min, é zot i koné pi déssi kèl pyé dansé. Tok ! Pran sa pou toi !

Justin la fé pou répons :
Mon vyé matante k’i koz touzour la boush rouvèr,
Mi pans ou la fine oubli in n’afèr la konté dann la vi bann plantèr La Rényon : ou la fine oubli la batay pou sov Kartyé fransé ! Sa té in gran konba pou vréman, pou garanti z’intéré bann plantèr, é lé vré ossi, pou fé rèss l’izine la rouvèr. Mi konpran pa pou kossa sa i an-nuir aou k’i défann lo zoutiy d’travay. Matant, bann nouvo kapitalis-la, sa in bann mèrsnèr, in bann rokin shagrin, é si domin i aranz azot fèrm l’izine, pou moin zot i ézit-ar pa. La Rényon, zot i s’anfout sa ! Zot nonbri la pa antéré issi. Zot problèm, sé lo profi, arien k’lo to d’profi. Ou i pans pa, si banna té i vé dévlop lo péi, nou n’ar té fine romarké dépi in bon koup de tan ? Matant, mi koné pa par-ki, mi koné pa kan, mé sak mi koné, sé k’i fo armène la batay nout dévlopman. In batay Kartyé fransé zénéralizé !

Justin