Oté

« Aroz zardin par tan d’plui ! »

In kozman pou la rout

Justin / 7 désanm 2016

Normalman kan la plui i tonm a kontant latèr i aroz pa zardin. Donk sa i vé dir ou l’apré fé in n’afèr initil. Moin la antann in zour in moun l’apré di sa dann in drol sirkonstans : in moun té i doi l’arzan la boutik shinoi é kan li sa pèye son dète, son dalon i di ali sak moin la mark anlèr-la. In konsèy d’apré moin pou pa pèye son dète. Lo mèm ga l’avé ranplas « ki pèye son dète s’anrishi » par « K’i pèye son dète i vien pli o ki ! ». Sa i vé dir shakinn i viv solon son prinsip dsi la tèr-la, mé in pé zotnapoin lo mèm prinsip ké lé z’ot ; kisoi in moun na lo voul, kisoi in moun la poin. Mé na dé foi, konm in bon dalon amoin téi di : « In pé i rode fé l’ ronar é i gingn fé arienk lo korbo ! ». Mi lès azot kass z’ot tète la dsi é ni artrouv pli d’van sipétadyé.