Bien antandi issi la Rényon, analfabète, sansa ilétré sé par raporte la lang franssè. Pars lékol i fé dann la lang bann franssé de toutan.Lé inportan dir in n’afèr konmsa pars nou néna bien in lang nou la fé-dizon lo pèp la fé- mé nou la zamé gingn lo droi aprann lir épi ékrir dann lang-la. Sé l’èr k’dann la lang bann franssé in bon kantité d’moune la pa gingn lir épi ékrir.

Issi la Rényon nout toutt la parti lékol pars dopi in bon bout tan néna lékol pou toutt zanfan mé néna vin pour san d’moune an laz lir épi ékrir dann la lang franssé lé ilétré .Sa i fé d’apré mwin in santène milyé d’moune néna problèm léktir épi ékritir dann la lang bann franssé… Dizon toutsuitt, lo problèm lé la é ziska zordi la pankor trouv vréman la klé pou règ problèm-la.

Sa néna in rapor avèk nout lang kréol, sansa la pwin ? Mi koné shak rényoné sé in ékspèr dann sète afèr-la. Mi koné ossi shakinn néna son l’opinyon- in pé va dir son lidéolozi- é la plipar d’tan ni parl késtyon-la konm ékspèr, mèm konm savan. Arshipèl yèr soir la mète la késtyon dsi lo tapi é bonpé d’moune la anparll de sa…Mi kroi pa in lémission va gingn aporte la klarté dsi in n’afèr konmsa, mé i pé touzour ésséyé .konm i di, ésséyé lé pa défandi, rofizé lé pa batu.

A bon antandèr salu !

Justin