Sa lé inportan sa, pars la transmission noute lang épi noute kiltir, la transmission bann valèr noute pèp i komanss dopi lo tan nou lé dann vante noute momon é aprésa i kontinyé… sé par lo kouloir noute lang matèrnèl ké ni komanss aparténir noute pèp, ni komanss partaz noute kiltir rantre nou.

A, biensir ! Mi prézante azot in sityassion idilik mé listoir é la vi dann noute péi - konm dann bonpé koloni — i amontre anou la pa noute lang matèrnèl la mète an valèr de tou tan, mé in n’ote lang téi sorte ayèr. Lo kontrèr kan lidéolozi dominante i domann bann momon koz franssé sinploman pou élimine noute lang kréol.

Mézami, mé frèr émé sèr, si noute lang kréol lé vivan konmsa sé ké noute pèp la konète rézisté-myé k’sa, li la konète dévlopé é vnir plizanpli for avèk lo tan.

Astèr si i domann kèl lang mi préfèr, m’a dir azot sé noute lang matèrnèl - noute lang kréol rényoné — pars sé nou k’la fé sa. Lé zot lang ni anprète mé séte-la sé nou k’la fé é sé pou sa sa lé inportan pou nou. Sirtou ké konm i di sé lo promyé marke lo zéni noute pèp rényoné.

A bon antandèr, salu !

Justin