Pou mwin shif-la lé in pé étonan pars l’ané 2020 l’avé poin zanfan téi dor déor la nuite é i paré lo Prézidan dann son promyé kanpagn éléktoral l’avé di li sava pran toute déssizion k’i fo pou done shak zanfan inn plass kissoi dan la kaz son famiye, kiossoi dann foiyé dann in foiyé é wala oussa nous ré randu katran apré.

Antouléka lé pa for pou in péi konm La franss i tonb sizyèm puissanss mondyal… I fo dir sirman bann gouvèrnman franssé néna, konm i di, d’ote sha pou fouété pars zot lé tro okipé pou fé bann gro-gro dépanss i sèrv pou d’ote shoz ké lo bien-ète bann franssé é an parmi sirtou sak lé pli frazil.

Poitan néna kékzour lo Prézidan téi di li vé in gouvèrnman pou travaye pou lo bien-ètre bann franssé é- li razoute galman pou fèr bann réform indispanssab é kan wi antann in kozman konmsa i fo méfyé- é sak lé pa kontan konm k’i diré, li na ka pran Konstan. Anshèv avèk sa i paré in majorité d’moune lé pou k’i diminyé bann zalokassion pou bann zémigré. Pars néna ankor in pé i panss i tir dsi zot larzan pou done bann migran.

Mi koné pa si néna in statistik dsi la Rényon épi bann zanfan abandoné mé mwin lé siréssèrtin zanfan pov sa i manke pa shé nou : néna inn léstatistik i di, issi La Rényon, la moityé bann zanfan i viv dann in famiye pov é sa sé in n’afèr k’i amélyor pa avèk lo tan. Sa i anpèsh pa ké pou déssèrtin, i fo ankor, abèss lo program la rézistanss… In program néna prèss katrovin zané.

Mi yèmré in gouvèrnman i désside in kou fé pass in loi-kad, in gran plan pou élimine la mizèr pars nou la gran bézooin in plan konmsa koméla.

A bon antandèr, salu !