Kann sé ankor la motyé bann tèr kiltivé La Rényon é kissoi pou protèz la tèr, kissoi pou an avoir in rovni malgré siklone, kissoi pars la famiye plantèr kann sé in famiye néna san mantir in savoir fèr é sa lé transmi zénérassion apré zénérassion dopi o mwins plizyèr syèk-dizon dopi komansman diznévyèm syèk.

Poitan néna konm in kabal dann lo péi pou k’i arète plante kann. Arète plante kann apré toute bann roshèrch téknolozik la fé la dsi. Kissoi pou in méyèr rannman dann shan, kissoi pou in méyèr rannman an sik, kissoi pou toute bann rishèss i gingn dann lé z’akoté, kissoi ankor pou l’ède lo gouvèrnman i akorde. Arète la plantassion kann kan i koné toute bann possib avèk la kann pars konm nou la fine dir dann noute zoinal kann sé pa solman lo sik mé toute sak i pé tiré ladan. Ni sar pa répète anou zordi, mé ni koné bien lé possib tir in gran kantité ko-produi.

Alor, kossa i fo fèr ?Sirtou pa arashé, sirtou pa abandoné, kontinyé.Mé lé sir bann plantèr-i rèss solman 4500 zordi- mé banna i vé pa kontinyé travaye pou la po d’patate… Bann zanssien i rapèl lo tan kan lo dèrnyé sharète kann i sava balanss, téi mète in bouké dsi kom pou dir sé in zour d’fète. Dann tan lo métyé d’plantèr lété in bon métyé ébin akoz i rovien pa ? Mi doute pa ké lo tan bann vash grass i pé artourn ankor sou form d’in loi kadre pou in vr é dékolaz ékonomik.In vr éplan dsi plizyèr z’ané pa bann rényoné pou nbann rényoné..

A bon antandèr salu !