Alor mwin néna in sinp késtyon pou pozé : kissa rante zot la done zot avi dsi la rantré zognon issi La Rényon. Kissa rante zot L’érop la koz ansanm pou dir sé sa k’li vé é sé pa sak bann plantèr La rényon, kan zot i fé pouss zot zognon toupi.

Biensir na poin in sèl kréol rényoné la donn son avis la dsi pars L’erop i koz pa avèk nou. Pétète li pé aksèpe gouvernman franssé i done son avi mé gouvèrnman franssé na poin d’avi la dsi. Li la pa pèr ni pou son linportassion, ni pou son lésportassion é La Rényon, mondyé ségnèr sa lé pti sa lé loin. Alor kissa i fé in ka sanm sa ?

L’avé in moune téi fé in ka sanm sa sé Paul Vergès é apré li Elie Hoarau mé lé zot lé pa la avèk sa.

Pou koué mi pran lo ka d’zognon ? Pars sa lé sinbolik dsi noute kiltir issi La Rényon. Dabor bann plantèr sé dé shèf dann lo plantaz zognon épi ni mète sa inpé dann toute noute kuizine Donk si sa i ariv a manké, si lé rar nou lé dépéizé, ni gingn pi fé kui noute manzé korèktoman.

Biensir Paul Vergès lé pi la, Elie lé pi député éropéin, alor lé zot i porte pa antanssion dsi la kiltir rényonèz. Sé pou sa i fo nou néna in député éropéin kominis pars li sar atantif bann détaye-la. Dsi lalist Deffontaines néna in kandida i apèl Ary, ébin alon vote Deffontaines tèl fasson ké néna in kontinuité dann noute lite. Apré Elie, épi apré Paul pou kossa nou noré pwin in porte drapo kominist rényoné ?

A bon antandèr, salu !

Justin