Mézami, pou mon par mwin la zamé fé in n’afèr konmsa. Mwin la pankor non pli pouss kanar dann la pante Bèl-èr konm déssèrtin patoi i di, mé mi panss dabor sa i doizète in bon pagaille — in zoli bordèl — konm in pé i di mé anpliss sa sé in lakt initil : kékshoz wi fé mé i ansèrv pa arien.

Dann noute kréol rényoné néna in bonpé lésprèssyon pou dir « alé fé in akt initil ! », alé fé kékshoz i ansèrv pa arien ni pèrsone mé sa sé in manyèr pou rabèss la valèr in moune konm i fé souvan dé foi. Mwin pèrsonèlman étan marmaye osinonsa jenn-jan mwin noré té vékssé si i di amwin in n’afèr konmsa.

Zot i koné kréol lé sissèptib — in pé i di sisséptime — mé la pa pou sa k’i fo gaskone ali épi rabèss ali. Mi rapèl kan bann grann pèrssone téi di amwin in n’afèr konmsa larm dolo téi koul dann mon zyé é mové-mové passé téi vien dann mon tète.

Alé ! Mi kite azot rofléshir la dsi é dsi linitil rabèss demoune é ni rotrouv pli d’van sipétadyé.

Justin