Médam zé méssyé, la sossyété, koz èk mwin sé koz èk in kouyon mé sé o pyé d’lo mir k‘i oi lo masson.

Mézami néna inn-dé matin, dann in radio mwin la antann téi parl bann kozman na poinn sanss par zot mèm é konm légzanpe lo lanimatèr la sit lo kozman mwin la marke an-o la.

Si mwin lété lanimatèr mwin noré di,néna déssèrtin kozman wi konpran pa lo sanss dirèktoman, mé sa i vé pa dir na poinn sansss. Pars si ni rapèl bien, fitintan pou alé médssin téi falé alé rode in bon dann la méri kissoi roz, kissoi blé, kissoi blan é avèk sa wi sava médssin, dantist, sansa sa téi ansèrv in fèye pou lo soin.

Astèr si ni arparl noute lékspréssion, si téi di anou alé rode in fèye sé pars nou lé malade donk nou la bézoin lo soin. In foi mi rapèl mwin lété dann légzagone-figuir sink koté-é mwin la antann in moune kriyé :va té fèr soigné ! donk ni rovien dsi noute kozman pou la route. Kan i di aou alé tir in fèye, an fète i di aou ou lé malade é i fo fé soign aou.

Alé ! Mi kite azot rofléshir la dsi é ni rotrouv pli d’van, sipétadyé.