Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

Alon anparl ankor i kou la kour dé kont, vik’li lé ankor dann laktyalité

samdi 30 mars 2024, sanm Justin


Asoir-la lo prézidan la Kour dé konte, la pass dann télé épi li la pass galman dann inn-dé radyo. Avan li l’ariv shé nou, la pète in dézorde dann park kanar pars la plipar d’moune gosh konm droite i méfyé kan i parl la réform loktroi d’mèr é néna d’koi konm nou la romarke sa dann toute sobatkoz.


Néna d’koi pars sa in larzan i pèrmète bann komine d’an avoir in bidzé korèk, pars sa i pèrmète galman défann noute prodikssion intèryèr avèk in sèrtène déssantralizassion épi in priz résponsabilité dann bann péi l’outremèr.

Astèr i di sé kékshoz i fé rogoumante lo kou d’la vi, ébin sa lé normal pars zistoman sa lé konpri dann son rol vi sak nou la ékrir an-o la. La pa bézoin ni kashyète déyèr noute doi, li lé zistoman fé pou sa avèk zordi in lobzéktif, lotosifizanss alimantèr.

Astèr oussa sa i sorte ? Si mi kroi mon téléfone sé in taks i romonte dann tan lontan ; dann tan Colbert l’ané 1670 é lé valab ankor zordi dann bann péi l’outremer mé gouvèrnman i vé méte in poin final pou in rézon k’i konssèrne ali mé k’la pa in bon rézon assiréman.

Mé in n’afèr drol sé kan wi sote la mèr wi koz pi parèye kan ou lété laba dann légzagone. Antouléka sé sak mwin la santi kan mwin la ékoute lo prézidan la cour dé konte ésanm poumwin kan li v’ariv déor li va shanj ankor diskour.. Si tèlman ké nou néna intéré bann bon zavoka i plède pou nou sansa ké ni pran nou mèm noute prop défanss.

L’èr-la méfyanss, gran méfyanss, pars si néna pou défann noute lintéré sé nou k’lé lo myé plassé, pa lé z’ote antouléka.

A bon antandèr, salu !

Justin


Inn modékri, inn ti lavi, inn komantèr ?

signaler contenu


Facebook Twitter Linkedin Google plus