Astèr mi ékoute radio é mi apèrssoi déssèrtin i di pou amontr bann danss konmsa la pa bézoin in formassion pars sa i danss natirèlman. Mi rapèl in tan téi di galman la pa bézoin amontré donk aprann la lang kréol pars sa lé natirèl. Sanm pou mwin sak téi di sa té pou lamontraz franssé épi d’ote lang mé konte lamontraz kréol. In kroiyanss konmsa mil foi répété la fé d’tor noute lang-la fé d’tor la lang nou la fé, sète nou la invanté, sète nou la fabriké.

Alor néna in késtyon pozé : i fo aprann séga, maloya… osinonsa lé pa nésséssèr. Néna in dézyèm késtyon : si i fo aprann, avèk kissa ni aprann, avèk bann danssèr lé bien kalifyé ladan - bann militan kiltirèl par égzanpe -, osinonsa avèk bann dansèr bien kalifyé ladan pars zot la aprann bann danss-la dann in formasion kalifyante… Mwin pèrsonèlman mi panss i fo aprann donk i fo amontré, mé dann kèl kondission i form bann amontrèr-la. Pars ni antan dir sar obligatoir dépanss dé mil é dé san pou form in amontrèr é sak néna la formassion ébin sar blijé pèye azot an konsékanss mé bann zassossyassion na poin larzan pou pèye bann brové d’éta pou amontr bann danss-la.

Alor kossa i fo fèr ? Mi panss i fo komanss par ékoute la baz, ékoute lo moune é domann lo moune kossa zot i vé. Mwin la fine dir mé lé trist tazantan dann bal oir in troupe maloya arivé, zoué anparmi l’moune é la plipar d’moune apré rogardé san danssé konmsi sa lété in kékshoz étranj, inkoni o batayon. Di pa mwin zot ossi zot la pa romarke sa !… Donk i fo domann la baz kossa li vé monte in l’organizassion an konsékanss. Si nou lé dann in sossyété monétarizé, lé sir k’i fo trouv la moné. Si nou lé dann in sossyété d’roshèrch ébin i fo finanss la rosrhèrch — mi pé mèm azoute èk sa si ni vé konète vréman noute kiltir, i fo ni form anou dan sa é bann formatèr i doizète formé é bien sir o bou di konte péyé an konsékanss.

Mézami mi panss néna pou débate la dsi é si la loi tèl ké lé danzéré, lo léssé fèr-léssé alé lé riské. Lo séga lé mèm pankor rokoni konm patrimoine limanité, lo maloya lé rokoni mé pétète konm in danss paré pou disparète konm lo séga tanbour sagossien an risk disparission, épi lo séga rodrigué.

A bon antandèr, salu !

Justin