Kossa banna téi di fitintan issi shé nou ? Téi di lo sèl lang lansègnman possib issi shé nou sé lo franssé é pou lo franssé bien réissir dann son lansègnman téi falé bann momon téi prépar zot zanfan pou bien aprann lo franssé épi an franssé-donk pou bann madam an voi d’famiye, koz an franssé. Dann déssèrtène famiye, la ziska mète a koz franssé — franssé boulon konm in pé téi shante dann kabar.

Donk kan mi ékoute sak i di dann télé dsi lansègnman dann Madagascar i di bann famiye la mète a parl franssé pars franssé é la lang lansègnman épi ka i anparl malgash i di sirtou pa roprann lansègnman an malgash — batizé lang véikilère. Anpliss ké sa i di dann malgash na poin lo matèryèl pou in bon lnsègnman. Toudinkou mi di, dann mon kèr, kossa k’i éspass ? Ni rotourn dann tan la kolonizassion. — Kossa ?

Astèr mi réaliz mi koné pa arien d’sak i fé shé noute voizine Madagaskar ; mi konstate noute linformassion i dévire lo do avèk lo pé bien assossyé avèk noute pèpléman. Boudikonte mi poz amwin i ta késtyon é mi mouline in pé dann vide pars lékol shé nou i parl pa ditou Madagaskar, i di pa nou ditou listoir gran péi-la, anparl pa nou son bann rishès é toute zafèr lé norma konète rante voizin.

Antansion, mi doute pa ké issi shé nou néna demoune i koné sak i éspass Madagaskar mé mwin lé sirésèrtin sa i doizète lo privilèz in pti minorité mé mi panss sa i pé pa z’ète konmsa dann la diré : nou lé dann loséan indien nou lé pa ? Noute déstin sé d’amar lé z’amar avèk noute bann voizin oui sansa non ?

Mézami oila ké nou lé alyéné par rapor noute bann voizin. Wala ossi ké noute bann voizin zot mèm i marsh konm k’i diré dsi la tète é pa dsi zot pyé. Apré va di lo kolonyalism la fé anou di bien alé oir li la foute anou dann in dégré d’aliènassion é ni gingn pi ansorte anou la dan.

A bon antandèr salu !

Justin