Mé dir avèk fèr lé pa lo mèm zafèr pars koméla dann in bonpé péi,bann kapitalist la fine kapar bann gran média é zot néna lo moiyin par la piblissité, par lo védétarya, épi par la kapassité bann zaktèr linformassion démontre aou par A+B ké 1+1 sa i fé pa 2 é zot néna rézon é sak i kontredi azot na tor vi ké lo kontgradiktèr na pwin lo moiyin pou inpoz son vérité ali é fèr an sorte ké bann zidé la lé gagnan dann lopinyon piblik.

Mézami zordi ni viv dann in drol d’épok é la plipar rantre nou i bèss lo bra dovan bann zidé dominante répété mil foi si tèlman bonpé d’moune i fini par kroir sé sa la vérité…In légzanp : lo bann zékstrème. Lo prézidan la invante mo-la, bann zoinalist la ropran sa a zot konte, lo bann konsomatèr d’média zot ossi zot la panss sa té in n’afèr just, in bon n’afèr, é té i fo kroir sa konm in vérité dann lévanzil.

Bann pti kolon, bann militan, bann sitoiyin ordinèr zot ossi la trouv sa i koréspon la vérité é wala ké bann zélu inn-de parti i dovien bann zékstrèm é in sondaz apropriyé i vien a –tan pou dir bann zékstrème la pa bon é i fo sirtou pa zot i partissipe lo gouvèrnman lo péi. A, biensir la majorité d’moune la pran sa pou la vérité.

Issi la Rényon, nou néna bann pti kolon la trouv bann konssèp-la bien alé oir zot mèm, par zot passé,par zot prézan, par zot zidé zot lété é zot lé ankor lo zékstrème par rapor sak i partaz bann zidé dominante. Mi rapèl in zour mwin té kandida parti kominiss é Zoinal de lisle la pa anonss mon kandidatir. Mwin la anvoye in télégram é lo landomin lo rédaktèr an shèf lo zoinal la réktifyé la list kandida épi la azoute mwin lété koni konm militan la CGTR, in kouroi transmission lo PCR. Donk wala mwin ossi dyab ké lo dyab é pétète pliss ankor.

Sak i panss zordi nou lé bien konssidéré, ké nou lé pi dann bann zékstrème ké zot i atann ni rolèv in pé la tète é zot va oir si bann malédikssion lontan i arpèz pa dsi nou, é si lo bann média i diabloliz pa nou ankor in foi. Sa i pé ète vré pou sak la koupe lo pon avèk nou é zot i pé rotrouv azot zot ossi diabolizé pars zot i fé pa parti lopinyon bann bien panssan.

A bon antandèr, salu !

NB In provèrb zalman i di : « Manssonz la pate lé kourte ! ». Lé vré mé alé trape ali si wi vien bou.