Médam zé Méssyé, la sossyété, koz èk mwin sé koz èk in kouyon mé sé o pyé d’lo mir k’i oi lo masson.

Mézami étan pti, gingn kou d’kongn lété lo kotidien bann marmaye. Pou kossa ? dabor pars konm ia plipar d’moune nou téi marsh pyé tou-ni é konm l’avé bann tète lo rosh in pé partou nou téi gingn kou d’kongn.

Kou d’kongn ? Sinploman noute doi d’pyé téi bite konte in tète lo rosh é téi vir lo po jak dovan déyèr- mi anparl mèm pa zot la doulèr épi sa téi singn, épi lo zong li mèm té ataké, souvan lo gro doi d’pyé lété or-d’konba pou in boute tan. Noute momon téi mète vite la grèss épi safran avèk in morso la toile tortiyé dsi an atandan la natir i ropran son droi.

Mé kou d’kongn sé ossi in shok pa solman fizik. Li té parfoi moral konm in boush ta guèl an piblik, konm in limilyassion.antouléka téi nonm ali koudkongn mèm.koméla si lo kou d’kongn fizik i gingn prèss pi, kou d’kongn moral sa i gingn é souvan dé foi.

Alé ! mi kite azot rofléshir la dsi é ni rotrouv pli dvan sipétadyé.