Mézami zot i koné kréol i yème piman — antouléka la plipar rante nou — é si néna in manke lo pri i mète a goumante vèrtizinèzman, é bann sitwayin lé bien an pène ashté piman pou mète dann kari é sé pou sa i di lo kozman mwin la mark an-o la.

Mé koméla piman lé pi toussèl dann son noblèss é pa pli lwin k’sète ané néna zépiss la goumanté pars linportassion koméla i komann anou : zot i rapèl momandoné lo pri l’aye, lo pri zoignon, lo pri d’tomate épi d’ote shoz ankorkoman sa l’avé grinpé ?

Alor, ni pé domandé si bann sézon pri for i sava ariv ankor plizanpli souvan pars nora in spékilassion dsi bann zépiss konm nou la koni : in rézilta lo réshofman d’klima ? In suite la spékilassion roganizé ? In, difikilté d’transpor ? Osinonsa d’ote rézon kashyété.

Par l’fète, mi koné pa mé mwin lé sirésèrtin i fo ni rofléshi la dsi é si ni trouv pa la solission bin alon fé fouye inn-dé trou anpliss dann noute sintir é ni rotrouv pli dvan, sipétadyé.

Justin