Médam zé Méssyé, la sossyété, koz èk mwin sé koz ék in kouyon, mé sé o pyé d’lo mir k’i oi lo masson.

Mézami, lé pa rar dann noute sossyété néna demoune i panss zot lé pa bien konsidéré kissoi dann travaye, kissoi dann la famiye, kissoi ankor an parmi zot bann kamarade. Sé pou sa zot i di dann zot mèm, i pran azot pou mang atèr.

In mang atèr la pa in mang bon kalité pars atèr li pé z’ète in pé krazé.Lé possib galman lo ra la fine travaye ali in pé-i fo dir lo ra i travaye bann mang dopi an-o dsi l’pyé épi tazantan i lèss zot marke lo dan dsi lo frui.Fransh vérité ni oi in mang bon kan li lé anlèr dsi lo pyé mé kan li la fine tonb atèr li plé pi nou .

Konm i plé pa nou d’ète pri pou in sitoiyin dézyèm katégori, d’ète in moune lé pa rosherché pou sa konpagni.Alé ! mi kite azot rofléshir la dsi é ni rotrouv pli d’van, sipétadyé.