Mézami, nou kréol, nou la touzour gingn problème avèk l’èr. In tan téi di : l’antèrman katrèr pou sinkèr. Apré néna lo kar d’èr kréol ki done shakinn lo droi si in rényon i komanss névèr d’ariv névèr-in kar.

Mé ariv bonèr la pa bon non pli.

Mi souvien lékol Boi d’nèf, l’èr rantré lété uitèr é in bonpé marmaye sétèr té fine arivé. Mi rapèl galman lo brindzing la fé kan la di lékol i komanss uitèr mé i pé rante dan la kour moinn-kar. In pé té pa kontan pars pou zot inn foi la korvé lé fini, inn foi lo mizo lavé konm mizo l’shate, inn foi la fine fé lo komission déyèr la kaz ébin téi bour an dsandan sansa an montan pou alé lékol.

Boudikonte néna dé mové réspéktèr l’èr, sate i ariv bonèr épi sète i ariv tar pars koman koman zot i komann lé zot pou la késtyonn l’èr.

Alé ! Mi kite azot kass zot tète la dsi é ni artrouv pli d’van, sipétadyé.

Justin