Mézami, zot i koné dann noute sossyété rényonèz bann kozman i né, i rèst vivan osinonsa i disparète. Sé konmsa ké dann mon vi déza long mwin la konète in bonpé kozman é an parmi sète mi sorte ékri an o la.

Mi panss sé pou rapèl le moune kan la fiks in èr, i fo réspékté. Difissil dann in péi lantèrman sé katrèr pou sinkèr é bann rényon piblik i komanss souvan défoi avèk rotar. Mé sa i anpèsh pa nou d’ète a l’èr, antouka d’ésséyé.

Koméla ankor ni antann parl lo kar d’èr rényoné — mi panss sa i vé dir si wi ariv in kar d’èr apré l’èr sé konmsi wi réspèk l’èr mé si lo tan sé larzan, mi panss i fo pa abizé.

Alé ! Mi kite azot rofléshir la dsi é ni rotrouv pli d’van, sipétadyé.

Justin