Mézami di amwin si zot i koné kossa i lé in gongon d’soufranss ! A kou sir sa sé in linstriman d’travaye !La piosh, la pike, i pé z’ète gongon la soufranss pars lé dir pou manyé ali dann solèye. Mé lo sab pou koupe kann dann solèye, sa la pa in gongon d’soufranss mé fransh vérité la pa in plézir pou manyé ali.

In foi mwin la antann ziska in moune apré apèl son piosh, donk son gongon d’soufranss son guitar. Pou kossa son guitar ? Sirman pars kan i bate dsi galé sa i fé in note la mizik. Mi koné pa si sé lo la, osinonsa in n’ote mé ni pé di sé in note dé mizik.

In note dé mizik ? Alala kékshoz lé bien agréab. Mé lo gongon soufranss lé pa agréab ditou si wi konte diriyon sa i lèss dan la min, osinonsa zanpoul pété, osinonsa toute kalité doulèr. Akoz alor i kriye sa guitar ? Sirman pou plézanté é dann in ka konmsa lo zoinlyé i plézante dsi son prop konte.

Antouléka, sa i done pou rofléshifr dsi la fasson lé z’inn é lé zot papréssyé zot zoutiy. Alé ! mi kite azot rofléshir é ni artrouv pli d’van, sipétadyé.