Sa la pa bann demoune i koné pa travaye, pa bann demoune na poin in kapital, na pwin zoutiye, na pwin in savoir-fèr konm i dimé d’apré zot sindika la CGPER sé bann pti shèf lantropriz avèk toute sak i fo pou gingn zot vi mé zot i gingn pa : tro d’travaye pou loué zot bra, tro pti pé d’larzan gagné pou amene la vi korèktoman.

La plipar d’tan sé zot madam sansa zot méssyé k’i travaye an déor lantropriz agrikol i amenn larzan ki fo pou fé viv-viv in péla famiye… A biensir mi antan déjà in pé apré di banna néna kat-kat, i gingn l’ède l’Érop épi l’éta é an pliss i vann zot marshandiz or d’pri… Non lankète-la lé sèryé é li amontre lo modèl ékonomik lé pa vyab ditou.

A ! biensir zot la bénfissyé in réform agrèr dann tan : la SAFER l’ashté bann gran propriyété épi la koupe par boute sink éktar. Krédi agrikol l’avanss larzan ; in pé la gingn in kaz zour pou landmin mé konm i di lo modèl lé or-zé astèr pars an débitan mèm li té mal goupiyé si tèlman zordi zot i fé parti bann sèf lantrepriz pov, lo famé karante dé pour san bann ménaz agrikol i viv dsou pa d’pore la povrété.

Poitan zot la bataye, zot la grévé, shak koupe kann la komanss par in dézorde. La CGPER épi d’ote sindika la monte o kréno mé zordi lo modèl la pran lo fon é bann plantèr lé dann dézéspoir é zot i koné pa koman zot va ansorte azot kan i rèst azot arienk pou déklar zot mizèr é kontinyé la bataye pou la vi.

I fo robate lé karte. I fo rovoir lo modèl. I fo rovoir lo partaz dann kann. Mé kissa i rovoi sa ? koman i rovoi sa... Kan konm noute défin kamarade Lucien téi di, i koné pa kissa i gouvèrn noute péi. Sé la gouvèrnanss k’i fo shanjé ? Kan, koman, par ki ?… La vi lé bèl dann Paris. Sa balanss pa mal a Paris konm i di dann la shanson.

A bon antandèr salu !

Justin