Dann in promyé tan, mwin la panss sa sé in n’afèr difissil pou kroir. Pou kossa ? Pars dann l’tan si ou néna in lissé dsi lo téritoir kominal lété konm in fyèrté donk an mwin-mèm mwin la di lé pa possib. Mé, aprésa mon tète la travaye kant mèm é afors kalkilé mwin la mazine sak lo ga la di lété bien possib.

Mi rapèl Paul Vergès kan li téi vé mète bann zétide médssine, épi d’ote kalité zétide sipèryèr, issi La Rényon ébin in bonpé bann politissien la droite déssèrtin ankor vivan zordi la fé toute pou anpèsh fèr zétide konmsa La Rényon. Léta lokal - lo préfé - é mèm lo ministère loutremèr son koté la pa fé non pli lo forssing pou alé kontre-kouran la volonté bann zom politik réakssionèr.

Pou kossa ? Mi panss sé sinploman pars lo bann roprézantan bann gro-blan téi vé a tou pri anpèsh la promossion demoune bann klass popilèr é mi rapèl mèm in pé téi fé toute sak zot i pé pou anpèsh bann zanfan pti kolon suiv in éskolarité normal, pass in sèrtifika, mèm alé pass in brové pars pou pa priv bann gro-blan d’zot bann ralèr d’piosh épi évite bann zanfan pti kolon d’ète fyèr par rapor zot réissite.

Donk astèr mi rovien sak mwin la di pou komanssé : si bann gro blan épi bann rish téi vé pa i fé in lissé Tampon sé sinploman pou anpèsh la promossion zanfan bann pti kolon. Donk la tèz listorien i pé zète vré é bien korésponn avèk la réalité.

Toussa pou dir, dann tan é pétète ankor koméla l’avé dé kalité d’moune issi La Rényon an parmi bann zélite : sak téi véanpèsh mla promossion bann pti kolon épi sète téi vé la promossion zanfan bann pti kolon.

A bon antandèr, salu !

Justin