Alor pou kossa mi vote pou li ?

Pars mon kandida promyé tour la invite amwin vote pou lo gagnan promyé tour osinonsa dézyèm mé avèk assé d’voi pou ète prézan dézyèm tour. Li la fé sa avèk in formil mi pé apèl zénéral, in pé vag konm dabitid — mi panss li koné sak li fé mé lé difissil konm i di roganiz in maryaz rante in karpe avèk in lapin.

Sak i fatig amwin défoi, sé ké lo kandida lé élu, li fé konmsi lo program mon kandida proféré i égziss pa é li di li lé élu pou aplike son program — program mwin la vote konte promyé tour é mwin l’aporte mon pyèr pou in lédifiss mwin téi vé pa konstruir absoliman.

Dann mon kèr mi panss néna in solission pli réspéktyé d’la démokrassi é k’i done amwin kékshoz mi pé apèl in satisfakssion pars a bien kalkilé lé possib dann dë program trouv bann poin komin — pars néna touzour — é sirtou lé pa défandi kozé pou trouv kékshoz konm in program komin… si lé possib trouvé.

Lo problèm sé kan i désside fé vitman in zélékssion olèrk prann in pé l’tan. Sé konmsa ké méssyé Macron la désside dissoude la shanm dépité é provoke bann zélékssion antissipé. L’èr-la lo tan i manke pou in diskission dsi lo fon é sirtou dézyèm tour sa i ariv an vitèss é napoin lo tan pou dislkité. Domaz mé normal avèk in moune lamour la démokrassi lé pa son poin for.

In fraz Winston churchill i pass dan mon tète zordi-la é li di : « La démokrassi sé lo mwin mové sistèm possib ! » mé mi panss in kozman konmsa sa i fé travaye la tète é konm mi ariv o boute mon kozman, la pa l’èr pou rolanss lo déba mal de tète garanti.

A bon antandèr salu !

Justin