Pou kossa mi di sa ? Pars mon péi i pé pa z’ète fyèr zordi, apré zélékssion promyé tour. 55 % dmoune la pa parti voté sirman pars zot téi koné pa pou kossa osinonsa pou kissa zot nora voté. Biensir li va mète la fote dsi lé zot — lé pli fassil akiz lé zote —, dsi bann zom politik pars issi i yèm bien dir sa.

Mèm si zot na pwin lo pouvoir — par égzanp zot lé dann lopozission — va mète l’otèr dsi zot. Mèm si zot i di zot va domandé mé zot la pa promi d’gagné é si i gingn pa lo moune va trète azot mantèr é va mèm di volèr san raporte la prèv bien antandi. Mwin lé a d’ mandé si bann zom piblik sa la pa in pé mazossis. I fo ou néna inn doz de sa pou fèr l’om politik.

Dann tan nou lété sinploman militan é nou téi gingn pa arien sof dézagréman : lo kou avèk nèrvis, lo kou avèk kass-an-fèr épi limilyassion an kantité d’apré sak mi ansouvien. Avèk in pé shyass ou té riskab fèr in tour dann la kaz prizon… souvan défoi sé bann moune-la aprésa, lé batizé om politik épi lé akizé toute sorte de shoz.

Mon péi, lé vré zordi ou lé soumak — soumak pars boudikonte lo tan i pass ; zordi Macron, domin sépakissa, avan ankor Hollande, avan-avan Sarkozy toute sorte demoun l’avé pwin in bon solission pou noute dévlopman… épi néna lo parti k’i kriye dann lo dézèr, k’i di li néna solission : toute rényoné i rode ansanm épi kan lé fine trouvé léta i fé vote in loi kadre.

In solission ? Mi panss ké oui, mé pou sa i fo toulmoune i mète ansanm é kan la fine trouvé sé l’èr bann z’om politik sar pi kritiké pars nora in plan par bann rényoné, pou bann rényoné.…

A bon antandèr salu !

Justin