Médam zé méssyé, la sossyété, koz èk mwin sé koz èk in kouyon. Mé sé o pyé d’lo mir k’i oi lo masson.

Mézami zordi ni anparl in kozman i di tou lézour, pétète plizyèr fo par zour. Mi koné pa si sa i déride in pé latmosfèr mé dizon li lé fé pou sa. Kan wi détourn lo sanss in mo, la plipar d’tan si fé sourir linterlokitèr.

Lo promyé « bien » i parl la santé é lo dézyèm sé lo « bien » matèryèl donk ni oi sa la pal o mèm zafèr.Par l’fète kan zot i trouv in dalon kèl lékspréssion zot i di :ou lé bien ? koman i lé ? Kossa i di ? How are you ? Koman sa va ? Pétète zot néna d’ote mo pou dir sa antouléka provi ké sé in mo d’politèss. La politèss lé né avan nou ! ni koné sa.

Alé ! mi kite azot an dizan azot i fo pa dir in kozman par abitide, mékanikman, mé avèk in bone intanssion.Ni rotrouv pli d’van, sipétadyé.