C quoi so karoussel miniss-la ? I vien oir si poul i kakaye é i ponn pa La Rényon !

15 mé, sanm Justin

Mézami mi pé dir azot in n’afèr : sir é sèrtin si in défilé d’miniss téi gingn amene lo dévlopman dann in péi, aforstan, nou n’arté dévlopé é toute noute bann voiyan o rouz narté fine trape lo vèr, assireman.

Toute kalité miniss la fine pass La Rényon dopi Macron la vni Prézidan. Antanssion, mi di pa zot vien pa, vien azot si zot i vé mé pou kékshoz sèryé, pa pou bate tanbour solman. Konm i di pa pou zot zéfé d’anonss solman. Sa sé dé shoz ni koné, nou lé abityé avèk sa… mi yèmré, konm toute rényoné, zot i konssantr azot dsi l’éssanssyèl konm Elie Hoatreau la di laba dann in konféranss li la fé La Possession.

Léssanssyèl sé zistoman sak bann gouvèrnman i néglij é bann gouvèrnman Macron ankor plisss ké sak la vni avan. Zot i koné néna bonpé voiyan o rouz dopi in bonpé d’tan issi La Rényon é toute zot bann vizite ministèryèl la pa fé vir lo rouz an vèr pa in sèl foi. Dopi dé zané é dé zané zot lé touzour o rouz. La prèv lo manke léfikassité zot bann vizite ministéryèl.

Shomaj ? Dann rouj dopi toussa d’tan. Ekonomi d’prodiksssion ? Dann rouj mèm é plizanpli... Lilétrism ? Dannn rouj-mèm. La santé d’moune ? Touzour dann rouj. Linsékrité ? Opliss lo tan i pass, opliss li lé dann rouj. La vi shèr ? Dann rouj ankor. La mizèr d’moune ? Dann rouj touzour… Si ni porte antanssion lanvironeman, ni apèrssoi nou lé pa paré pou bien défann ali mèm si ni koné bien bann problèm-la é si nou néna dé zidé dsi la manyèr ni doi fé avanss bann problèm-la pou zot solission.

Médame épi Méssyé bann vizitèr mi yèmré konète si in zour, dann zot bann vizite, lidé lé pa vni dan zot pou konfyé bann séktèr difissil bann rényoné dann in nouvo manyèr pou partaz bann konpétanss — mi yèmré savoir dann tan kan Paul Vergès lété Prézidan si la pa vni, dann zot tète in lidé bann rényoné lété bien kapab fèr avanss bonpé zafèr issi La rényon, donk si zot la pa santi azot totalman initil…

Initil konm zot i aparé dovan nou kan zot i vizite, arvizite é arvizite anou. Initil dann zot zéstikilassion, dann zot zéfé d’mansh, dann zot foss solission. Mézami, mi rapèl in zour Mr Mélanchon dann in diskour o Por, kan li té apré di, li sava pa dir anou sak i fo fèr pou la Rényon pars demoune La Rényon i koné tré bien sak i fo fèr issi é la pa bann vizitèr initil pou amontr anou sak i fo fèr shé nou. Pétète zot ossi zot i panss konmsa tazantan san tir lo konsékanss.

A bon antandèr salu !

Justin

PadportImpasse du modèle

Signaler un contenu

Inn modékri, inn ti lavi, inn komantèr ?