Ni koné bien la pa Cuba solman lé dann la kriz Ni koné ossi souvan défoi bann péi an kriz sé pars zot lé pri dann in sistèm internassyonal injust i anpèsh azot dévlope zot lékonomi épi zot sossyété konm k’i fodré. Ni koné galman souvan défoi déssèrtin péi lé dann in kriz agravé pars zot gouvèrnman i amenn pa in bone politik avèk konm objéktif lo bien-ètre zot popilassion.

Mé dann lo ka d’Cuba dizon i fo pa ni anparl toute bann rézon-la, mé sinploman solon Salim Lamrani zot shomin lé boushé partou par lo shèf de file lo monde di lib é sé Lé zétazini d’Amérik k’i anpèsh lo péi d’avoir bann rolassion normal avèk zot gran voizin, mé galman avèk in bonpé péi lé sou la ménass in sankssion amérikène pou lo ka zot noré bann rolassion normal avèk Cuba- ni pé galman anparl la konplissité lérop ki koné arienk lalignman dsi lé z’USA.

Salim Lamrani-proféssèr liniversité La Rényon- sé in spéssyalist bann rolassion rante Cuba épi lé zétazini é na poin arien k’i ésape ali dann son bann zanaliz é pou sak i lir son bann zartik épi son bann liv, siréssèrtin sé lé USA lé résponssab an promyé si zordi Cuba lé dann difikilté konm li lé d’dan – Lé zétazini épi toute in kantité péi i amenn in politik avèk la lashté konm prinssip gouvèrnman san parl la koripssion zénéralizée.

Mézami si mi ékri azot sa zordi sé pars i fo pa ni gnor lo gran traka bann cubin épi zot gouvèrnman mé i fo pa ni kontante anou avèk bann foss zékplikassion bann télé i done anou é sirtou ké ni rode par nou mèm lésplikassion lo gran traka lo pèp cubain koméla é si ni gingn fé kékshoz-si pé ké ni gingn i fo ni fé.

A bon antandèr salu !