Mézami issi ba, néna d’moune i mazine zot i pé fèr ninporte koi é na pwinn limite pou zot pouvoir épi zot kapassité. Sé konmsa k’in pé i kroi zot i pé arète la plui, d’ote i panss zot i pé fé arète volkan koulé.

Kozman-la sé pou dir si wi fé kékshoz fé sak wi pé, sak i koréspon oute fors aou, é sirtou alé pa rode fé linpossib. Konm la gronouye kan li vé dépass lo bèf an grossèré finalman son vante i pète é li krèv an plass san réissi.
Mi panss sa i mérite in bon roflékssion dsi sak wi pé sansa sak wi pé pa fèr é ni rotrouv pli dvan, sipétadyé.

Justin