Zot i koné lo lakt lo pli inportan dann in péi konm La Franss sé son bidzé pou l’ané k‘i vien- konm nou lé dann l’ané 2024 sak i fo sé adopt in bidzé pou l’ané 2025. Pou sa, i fo komanss diskite sa a popré lo 15 zilyé l’ané 2024. Ni koné sète ané la pankor fé. I fé sa pou boukl in bidzé pou pass dovan lo dë shanm-sète bann dépité épi sète bann sénatèr- é sa i komanss lo promyé oktob.

Mé oila pou fèr in n’afèr konmsa i fo ou néna in gouvèrnman mé la franss na pwin gouvèrnman mé in gouvèrnman démissyonèr k’i pé parétil règ bann zafèr kourante dizon lo train-train kotidien donk pa bann zafèr inportan é biensir pa lakt lo pli inportan, lo bidzé pou l’ané k’i vien.

Konm lé shoz lé parti ni pé dir avèk siss somenn rotar lé prèské sir lo péi nora pwin in bidzé sof pétète in bidzé maron. In bidzé maron ? Oui sé sak lo promyé miniss démissyonèr l’apré éssèye fèr kan li anvoye inn lète kadraz bann miniss démissyonèr pou dir azot prépar azot pou dépanss ??? Konm l’ané passé pa pliss pa moinss.

Nou lé ankor dann zafèr kourante nou la ? Ni pé dir kouraman non , nou lé pi dann in shéma konmsa é bann gardien la konstitission konm lo konsèye konstitissyonèl é lo ziz la légalité konm lo konsèye d’éta mi panss l’apré vèye toussala konm lé dsi l’fé é v’ariv lo tan zot va di éstope : la politik kass-kou i pé pa kontinyé.

In pé i mazine lo Prézidan i voudré aplike lartik 16 la kontitission, sak i done ali lo pouvir égzékitif épi lézislatif dann in ka d’gran danzé pou la Répiblik épi son bann zinstitission par la fote in lévènman konm in guèrr sansa in ménass grav. Mi panss pa sa lé vré dann in ka d’trikmardaz lo Prézidan la déklansh par li mèm é opliss i sava opliss ni aprosh in sityasikon d’lanpèshman-in sityassion lo Prézidan li mèm i done rézon Méssyé Mélanshon l’apré rode lo pou dann son tète..

Alor, kossa k’i sava spassé la ? Mi koné pa biensir mé lé riskab éspass dé shoz lé pa tro rokomandab é konm ni pé dir nou lé pa dann mir mé ni sava droite é konm mwin la touzour di La franss sé La Franss é lé pa bon shatouye guèpe dann son ni.

A bon antandèr salu !

NB in zour bann tète do zèf té apré diskite dann télé é inn dan la bann la di lo Prézidan lé dann son rol lartik 68 la konstitission i done ali konm défann linité lo péi, son konstissyonalité, son zinstitission mé in note tète dozèf la réponn ali : kissa i ménass toussala ,si lé pa sèk mi kroi.