Donk dsi la fin lo parkour, momandoné mwin l’assiz dsi in mir, émwin lét a koté in moune té apré di sak mwin la ékri an-o la. Li téi di léspréssion dann la lang franssé é mwin la sèye konprann sak li téi vé dir. Par lo bann zégzanp li la di mwin la konprann li téi vé anparl lo sistèm nou téi viv dodan-Pou mwin ni viv dann sistèm néo kolonyal é pou li pétète ossi.

Antouléka li té i di, koméla li priv ali bonpé zafèr pars li vé pa nourrir la bète donk li vé pa nourrir lo sistème nou lé d’dan — sé konmsa ké li boyekote in bonpé produoi d’apré sak li di ési li pé li produi li ùmèm déssèrtin produi li vé pa s’an passé. Mi di pétète li rode in sèrtin lotonomi pèrsonèl é familyal mé zot i konpran néna pou diskité.

Néna pou diskité pars d’apré mwin si ni parl dévlopman, nou lé blijé romarke noute péi lé pa dévlopé konm k’i fo é nou lé blijé inporte in bonpé marshandiz ni pouré produi par nou mèm. Sa i vé dir noute péi sé in péi d’kontoir é bann prodiktèr déor la kapar noute marsh é opliss i sava opliss sistèm-la i agrav.

Astèr si ni boykote, é si lo boykote lé massif, sé bann travayèr noute péi lé riskab d’ète dann la difikilté é lo bit lé pa d’fé pèrde travaye noute bann kamarade… Sé pou sa i fo ni rofléshi kossa i lé la bète é koman ni pé lite konte la bète-la mé sa sé kékshoz mi panss i fé travaye la tète… Mi kite azor rofléshir la dsi é nou néna lo tan pou mète noute zidé an klèr.

A bon antandèr, salu !

Justin