Dsi la tèr néna toute kalité demoune, i amène la vi toute kalité la vitèss. In pé i sava vite, in pé i sava normal, in pé i émite ziska léskargo. Sa i annuiye pa mwin pars pou mwin toulmoune lé lib amenn son vi konm li vé. Provi k’i amenn pa sa an sharète shaviré.

Mézami mi koné in kozman kaziman syantifik é poitan bien anploiyé par d’moune é kozman-la i di : « La vitèss néna son tan ». Mi yème bien sa pars pou mwin sé kaziman in téorème an syanss fizik. Si ni rofléshi bien pou sorte la vitèss zéro pou ariv la vitèss x i fo in tan sé sa k’noute kozman i vé dir.

Mé si ni vé anparl kozman mwin la marke an-o la, dabor i fo ni di anou sa kozman-la i sorte dann in séga i komanss a daté mé la garde son zénèss épi son fréshèr, mèm son létèrnité si ni di lo parol sé parol Madoré é Madoré lé étèrnèl. Ni pé dir li néna la plass i mérite ali dann noute kiltir kréol La Rényon.

Alé ! Mi kite azot rofléshir la dsi é ni artrouv pli dvan sipétadyé.

Justin