Kan déssèrtin téi di sa, zot téi vé dir néna d’ote kalité déssizyon lé possib prann an métan lidéoloji d’koté : donk wala k’i pran bann déssizyon sinploman téknik, osinonsa ékonomik é sa i vé dir sé in déssizyon rézonab, k’i obéi bann shoi ékonomik — boudikonte bann bon shoi i doi done bon rézilta… Alé dormi don !

Zordi noute toute i koné dann plizyèr domène konm lotonomi énèrjétik, konm ansèrv lo la mèr pou klimatiz bann batiman piblik, osinonsa bann shoi konssèrnan lotosifizanss alimantèr, konm nou la pa pri bann bon déssizyon kan lété l’èr — bann profitèr la bar noute shomin — zordi ni kour déyèr san ratrapé. Si Paul Vergès l’avé gingn prann bon kalité déssizyon dann tan nou noré pa trouv anou dann linpass konm ni lé zordi.

A ! Biensir vi ké sa lété la déssizyon la majorité Paul Vergès téi pé dir, sa bann shoi idéolojik é donk té i falé pa prann mé o fète kissa lé dann larozoir zordi ? Kissa si la pa bann rényoné ? Poitan bann déssizyon-la lété dann lintéré La Rényon é lété pou tir anou dann larozoir olèrk mète nou dann trou. Sé konmsa ké mi oi lé shoz !

Zordi néna in gran déba dsi Air Austral é gouvèrnman té bien dispozé akokine anou avèk Corsair olèrk ankouraz anou amélyor noute konpagni épi fèr an sorte ni baz anou lo myé possib issi dann losséan indien avèk bann bone rolassion rantre nou épi l’Inde épi La chine épi d’ote péi k’i borde losséan indien é sirtou pa tonb dann pano Air-Franss in konpagni monopolistik.

Mi sorte oir la préféktir épi bann zakssyonèr privé la obliz bann travayèr sign in zakor pou diminyé nivo d’vi-par-la 45 % par rapor 2020 épi goumante la sharj travaye… Pou rotrouv in konpagni bénifissyèr dann in an. Pandan s’tan-la kabri i manz salade é bann travayèr va rotrouv azot dann difikilté. Sa lé réalist sa ? Sa lé pa idéolozik ? Sa sé pa lidéoloji kapitalist sa ? Dor la don !

Si la pa sa, mi oi pa koué k’i lé.

A bon antandèr salu !

Justin