Médam zé Méssyé, la sossyété, koz èk mwin sé koz avèk in kouyon mé sé o pyé d’lo mir k’i oi lo masson.

Mézami d’apré sak i paré konpèr Athanaz té in blan lontan plizoumwin introdui dann volizinaz lo gouvèrnèr-dann tan La Rényon l’avé in gouvèrnèr . I parétré konpèr athanaz lété touzour dakor avèk inn, avè k l’ote, avèk toulmoune finalman-mèm si lé zot té pa dakor lé z’inn avèk lé z’ote.

Zot i koné lo kozman i di konmsa :dann oui la poin bataye .. ébin pèrsone téi bataye pa avèk Konpèr Athanaz pars li téi aranz ali touzour pou ète dakor avèk l’inn, avèk l’ote,avèk toulmoune boudikonte.

Si tèlman lo patoi mwin la marke an-o la toulmoune téi di sa, pou kass ti boi lo konpèr Athanaz mé li, li téi kontante d’ète konmsa é konmsa li téi konpran la vi.

Alé ! Mi kite azot rofléshir la dsi é ni rotrouv pli d’van si pétadyé.