Mi trouv l’Érop lé bien zénéré mé mi koné ossi bann péi éropéin néna pliss a gagné dann zakor konmsa : sinploman par lo zé d’in détériorassion bann term l’éshanj — rante bann matyèr promyèr i vann bon marshé épi bann produi transformé k’i vann plizanpli shèr — konm sa i éspass dopi lontan rante bann péi indistrializé — souvan bann zansiene puissanss kolonyal épi bann péi pa ankor dévlopé la plipar d’tan, bann zanssien koloni.

Mé oila si zot i pran lo ka d’La Rényon : zot i koné nou lé an rotar d’dévlopman, mé ni apartien l’Érop é nou lé oblizé aplik zot z’APE é bann produi i vien konkiranss lé n’ote pars nou néna arienk bann produi agrikol pou propozé mé avek bann z’APE nou lé tro konkiranssé.

Mé zot va dir amwi : la Franss i vèye pa don sa ? Nou nou lé pa dann la komission éropéene mé la Franss oui. Nou nou lé pa dann lé rényon bann shèf d’éta éropéin mé la Franss oui. Donk èl i pouré avèye in pé dsi noute zintéré alé oir èl lé pa la avèk sa. Sa i vé dir ké nou péi iltra-périférik ni trouv pa pèrsone pou défann noute zintéré donk i fo anou in roprézantassion pou nou — bann péi ultrapriférik — pou vèye dsi noute zintéré é sa sé la suite bann bon zakor Paul Vergès la fé signé é k’i fo pouss pli lwin.

Alor mézami lé sirésèrtini fo ké l’Érop i rovoi sète afèr d’APE pou trouv in méyèr lékilib. Nou la fine dir la pa solman sa : i fo galman l’Érop i vien apiye anou dann noute fitir plan fé par nou mèm é dann noute lintéré anou. Konm di la kandidate an dézyèm pozission dsu la list Deffontaine i fo fèr souf laba dann l’Érop léspri Paul Vergès pars sé kant mèm sa k’i fo anou.

A bon antandèr salu !

Justin